Na MWANDISHI WETU
-DAR ES SALAAM
MKUU wa Mkoa wa Dar es Salaam Albert Chalamila ameipongeza Kampuni ya Puma Energy Tanzania pamoja na Shirika la Amend kwa kutoa elimu ya usalama barabarani kwa watoto walioko shule za msingi kupitia kampeni ya ‘Be Road Safe’.
Asema mafunzo ya usalama barabarani kwa watoto walioko katika shule za msingi yatasaidia kupunguza ajali za barabarani hususan katika maeneo ambayo mafunzo hayo yametolewa huku akishauri elimu hiyo yatolewe nchi nzima kuongeza uelewa.
Pia, amesisitiza kuwa Serikali inaamini kwa kufanya hivyo kitaokolewa kizazi cha sasa na kijqacho kwa kuwa elimu ya matumizi bora ya barabara inaendelea kusambaa.
Chalamila amesema hayo leo Novemba 2, 2023 kupitia hotuba yake iliyosomwa na Mkuu wa Wilaya ya Kigamboni, Halima Bulembo wakati wa hafla ya kukabidhi zawadi kwa wanafunzi wa shule za msingi walioshiriki shindano la michoro ya kuelimiisha masuala ya usalama barabarani, iliyofanyika katika Shule ya Msingi Kibugumo, Kigamboni, Dar es Salaam.
Amesema kuwa kupitia mafunzo ya usalama barabarani kwa watoto hususan walioko katika shule za msingi Puma imefanya jambo kubwa katika kuepusha ajali za barabarani ambazo zimekuwa sikiisababishia nchi hasara kubwa kwa kupoteza nguvu kazi na mali.
Ameongeza kwamba mafunzo ya elimu ya usalama barabarani yaliyotolewa na Puma Energy Tanzania kwa kushirikiana na Ammend katika shule tano ni vyema yakatolewa pia katika shule nyingi zaidi kuwajengea uwelewa watoto wangi wa Dar es Salaam na hata nje ya mkoa huo.
“Serikali ya mkoa (Dar es Salaam) tunaamini kuwa kwa kufanya hivi tunaokoa kizazi cha sasa na kijacho kwa kuwa elimu ya matumizi bora na sahihi ya barabarani inaendelea kusambaa,” amesema.
Awali Mkurugenzi Mtendaji wa Puma Energy Tanzania, Fatma Abdallah, amesema mafunzo yaliyotolewa kwa wanafunzi hao ni utekelezaji wa mpango wa ‘Be road safe Africa) unaotekelezwa na Ammend katika nchi tano za Afrika ambazo ni Zambia, Zimbabwe, Tanzania, Botswana na Ghana.
Amefafanua kuwanzishwa kwa mpango huo kunatokana na takwimu mbaya za ajali za barabarani ambazo zinasababisha vifo, majeruhi na uharibifu wa mali.
Amesema kuwa nchini Tanzania pekee Jeshi la Polisi kupitia kikosi cha Usalama Barabarani kimetoa takwimu zinazoonyesha kutokea kwa vifo 1,545 na majeruhi 2,278 kwa mwaka 2022 kutokana na ajali 1,720 za barabarani.
Kuhusu kampeni ya ‘Be Road Safe’ Mkurugenzi Fatma Abdallah amesema kwamba ni jukwaa muhimu shirikishi linalokuza jamii salama kwa watoto huku akieleza kupitia mashindano hayo ya kuchora wameongeza ubunifu na uelewa thabiti wa kanuni za usalama barabarani miongoni mwa wanafunzi na kuongeza ufahamu kwa jamii ya Watanzania.
“Tangu kuanzishwa kwa mpango huo mwaka 2013 ‘Be Road Safe’ umekuwa mwanga wa matumaini na kwamba ni msingi wa kimkakati wa uwajibikaji kwa jamii (CSR) wa kampuni hiyo chini ya mpango mkuu wa ‘Be Puma Safe’ ambao pia unajumuisha uwezeshaji wa wananchi hususan vijana.”
Kwa upande wake Mkurugenzi Mkazi wa Shirika la Amend Tanzania Simon Kalolo ameelezea kwa kina kuhusu kampeni hiyo yenye lengo la kuwajengea uelewa wanafunzi na vijana kutambua matumizi bora ya barabara lengo likiwa kupunguza ajali za barabarani nchini.
Hafla hiyo iliyofanyika katika Shule ya Msingi Kibugumo ilihidhuriwa na wadau mbalimbali akiwemo Mkuu wa Dawati la Elimu ya Usalama Barabarani, Kamishna Msaidizi wa Polisi Michael Deleli, walimu na wanafunzi kutoka shule zilizoshiriki mafunzo na shindano hilo.
